النص الكامل لـتكفير المسلمين والمسيحيين غير الارثوذكس

كتب: ممدوح عزت

حصلت «الميدان» على نص التسجيل الصوتى للانبا بيشوى مطران دمياط ورئيس لجنة المحاكمات بالكنيسة على CD والذى انتقد فيه القمص زكريا بطرس راهب الكنيسة المشلوح من منصبه بسبب افعاله ضد المسلمين وننشر التفريغ الحرفى دون اى تدخل من جانبنا تاركين حق الرد والتعليق على كل ما جاء بالـ CD للكنيسة حتى لا تشتعل الفتنة بين المسلمين والاقباط نتيجة لالسنة اللهب التى يطلقها زكريا بطرس وطالت الاديان السماوية.. السطور القادمة تروي الحكاية من البداية:

ففى مؤتمر دير العزب بمحافظة الفيوم للشباب المسيحي قام الانبا بيشوى بالهجوم على جميع الطوائف المسيحية غير الارثوذكسية واتهمهم بالكفر والهرطقة والخروج على تعاليم الكتاب المقدس وسخر من عقائدهم وكذلك المسلمين وكل انسان غير قبطي ارثوذكسي فى العالم اجمع.

وسخر الانبا بيشوي من القديسيين والقديسات الكاثوليك مثل القديسة سانت ريتا مؤكدا بأن جميع الطوائف المسيحية سوف تدخل جهنم الا الذي يقول منها فى اللحظات الاخيرة «يارب اقبل ايمانى بالارثوذكسية ولعنة الله على عقائد الكاثوليك».

وأضاف ان كهنة الكاثوليك محرومون كنسيا رغم ايمانهم بخلاص الوثنيين بدون الايمان وبدون المعمودية وفيه اهدار للديانة المسيحية وهذا لا يؤدى الى ملكوت السموات.. ليبقى السؤال لقداسة البابا شنودة هل هذا الرأي يعبر رسميا عن رأي الكنيسة تجاه الاخرين ام لا؟ ويجب اعلان موقفكم الرسمى تجاه الانبا بيشوي واتخاذ ما يلزم من اجراءات ضده.

«سؤال مضحك عني.. يقول إذا كان نيافة الانبا بيشوي ينتقد القمص زكريا بطرس لأنه يهاجم الأديان الأخري فلماذا نيافتكم يهاجم بكل شدة الطوائف الأخري وتحكم عليهم بعدم دخول الملكوت.. أيو مش داخلين.. «ضحكات وتصفيق من الحاضرين..»

أو أنهم غير مقبولين امام الله.. بقي اللي بيجوز الوثني للمسيحي جوه الكنيسة دول هيقدروا يقفوا قدام ربنا.. دا انا لو قلت كده مقدرش اوري وشي لربنا.. مش بس كده..

واحد بيقولي انت بتهاجمهم ليه.. لما انت بتنادي بعدم الهجوم.. هنا يا صاحب السؤال.. لو كنت موجود في القاعة دلوقتي.. اطلب منك حاجة.. هات لي شهادة مختومة وممضية من رئيس الطوائف دي.. أو رؤساء الطوايف دول يقولوا احنا مش مسيحيين وانا لا يمكن اهاجمهم بعد كده.. وامضيلك علي الوثيقة اللي هاتجيبها» حيث انهم قد اعترفوا انهم ليسوا مسيحيين فلن اهاجمهم فيما بعد... تقولي يعني ايه.. ها اقول هما لو قالوا احنا مش مسيحيين خالص.. انا مالي بيهم.. لكن هما بيقولوا احنا كلنا واحد في المسيح وبياخدوا ولادنا.. ويقولوهم انتم بتعبدوا اصنام في الكنيسة لما بتبخروا للايقونات وعبدة اوثان لما بتسجدوا للقربان في القداس وبتخبزوا الاله بتاعكم في الفرن.. انت مانتش عارف هم بيقولوا علينا ايه..» من الواضح ان نيافته يهاجم البروتساتنت في العبارات السابقة «واحنا لا نستبعد انك انت نفسك بروتساتنتي..» يوجهه كلامه لصاحب السؤال.. «تصفيق من الحاضرين».

احنا جايين من آخر الدنيا وسايبين مصالحنا وشغلنا علشان نناقش قضايا خطيرة خاصة بالايمان عايزين انتم تخدوها دلع خدوها دلع..

يستكمل قراءة السؤال «نيافتكم تقولون إن الكاثوليك والبروتساتنت لن يدخلوا ملكوت السموات ولكن ما هو موقفنا نحن من جهة القديسين والقديسات الكاثوليك مثلا مثل سانت ريتا.. حاجة حلوة اوي، ما تجيب لنا حضرتك ايقونة لسانت ريتا نحطها في الكنيسة ده اللي ناقص.. والقديس منصور.. يا حلاوة.. علي القديس منصور منصورة يا ثورة احرار «تصفيق» «ايه القديس منصور ده انا عمرت ما سمعت عنه.. يعلق علي كلام أحد الجالسين بجانبه» ايوه ما هو اللي باعت السؤال بيقولي كده «وهم قديسين مشهود لهم بالقداسة حقا..» حديث جانبي لأحد المجاورين له «مثل قصة سانت ريتا وشوكة من اكليل السيد المسيح.. ايه بقي انا همشي ورا خرافات.. ايه شوكة اللي من اكيل السيد المسيح دي.. لقت شوكة يعني ولا لقيت شوكة محطوطة في رأسها ولا ايه بالضبط.. وممكن لما ييجي اللص بعمل الشيطان وبقوة آيات كاذبة وبكل خديعة الاثم والهالكين انتوا هتعملوا ايه لما ييجي ضد المسيح.. ايه حكاية الشوكة بتاعة سانت ريتا دي من اكليل المسيح.. ميعرفش.. ايه ده.. اي واحد يحكيلكوا حكاية يبقي خلاص.. ما بقولش عليكم يقول علي اللي باعت السؤال..

يستكمل قراء السؤال «هل نحن كأناس تحت ضعف من حقنا ومن سلطتنا ان نحكم في الشيء الوحيد الذي من حق الله وحده ان يحكم فيه.. «يا سلام جبت الديب من ديله يا سيدي.. يعني انا دلوقتي خدت حقوق ربنا وحكمت لما قلت ان غير الارثوذكس مش هايخشوا ملكوت السموات.. انا محددتش اسم شخص بالتحديد ليه بقي.. لأن فيه امور لا نعلمها.. افرض ان واحد كاثوليكي وهو في اللحظات الاخيرة من حياته قال «يارب اقبل ايماني بالارثوذكسية ولعنة الله علي عقائد الكاثوليك..» نيافته يضحك والحاضرين يصفقون..» انا بقي الشخصية اللي زي دي.. انا شخصيا مش هقدر احدد دي هاتركها لربنا بقي وتقييمه لموقف هذا الانسان.. هو عاش ومارس واتعمد علي اسم الثالوث القدوس وعاش بيعترف وبيتناول علي اسرار كنيسته.. لكن الكهنة بتعوا محرومين بمحامي  عندنا.. مجامع حارمين الكاثوليك.. حرومات متبادلة مترفعتشي قدول بالنسبة لنا كهنوت كله مشلوح في جميع الاسرار اللي بيمارسها .. مشلوح.. مشلوح.. حد يقدر ينكر دي.. فيه حرومات .. طب وبعدين.. لكن ايه تقييم ربنا للوضع ده انا ممكن اقول ان الشخص ده بالتحديد.. انا اسيب ربنا هو اللي يقرر مصيره هنا صاحب السؤال يبقي علي حق.. لأن انا هنا تدخلت.. وقلت رأي قاطع بخصوص شخص معين بالذات ولا اعرف كيف صارت الامور معه في حال موته.. لكن لما اقول ان عقائد الكاثوليك متوصلش للسماء لأن هما بيؤمنوا بخلاص الوثنين.. بدون الامان وبدون المعمودية.. ده اهدار للديانة المسيحية.. قسيس بيجوز غير المؤمن للمؤمن جوه الكنيسة.. وقداسة البابا قالها لكم امبارح واحتج عليها عند الكاثوليك.. طب ده انا اقبل ان وضعه ده يبقي مقبول.. بس انا مقلتش علي واحد معين بالاسم شخصية معينة بالتحديد.. لكن قلت هذا الطريق لا يؤدي الي الحياة الابدية والسيد المسيح نفسه قال كده.. من آمن واعتمد يخلص ومن لم يؤمن يدن.. فانا لما اقول من امن ولا ما امنيش دي مسألة غير عايزة بحث بقه.. ومين متعمد ومين متعمدشي.. هل معموديته هتقبل عند ربنا لو قال لعنة الله علي عقائد الكاثوليك.. معموديته ممكن تمر؟.. ده يعتبر اذا اضاف الي معموديتهم الاعتراف والايمان المستقيم.. فا احنا بنقول ايه في قانون الايمان.. نعم نؤمن بالروح القدس الرب المحيي المنبثق من الآب.. طب اللي يقول منبثق من الاب والابن.. ده هيودي نفسه ورا الشمس.. طيب هو من وقت وفاته قال إن الروح القدس منبثق من الآب.. أمن ان ما فيش خلاص الا بالايمان بيسوع المسيح وبالمعمودية.. ايه وضع معموديته وهو علي اسم الثالوث.. ممكن يعتبر معمودية طوارئ "Emergencyس لما الام بتعمد ابنها اذا ملقيتش قسيس وكان هيموت فاذا اضيف الي معموديته اعترافه بالايمان الارثوذكسي جايز ان دي يبقي ليها تقييم اخر غير انه يحسب في معسكر خارج الارثوذكسية.. علشان كده انا محددتش اسم شخص.. ولكن اناقت ان المنهج.. والسيد المسيح نفسه عمل كده.. تقولي طب ده السيد المسيح من حقه يقول.. وان ميقولش حاجة غير اللي هوه قالها.. يا فندينا انت ياللي باعت السؤال.. ها انا بأقول غير اللي قاله السيد المسيح.. هاه.. مش قال من آمن واعتمد يخلص ومن لم يؤمن يدن.. مش الكتاب قال في حاجات كثيرة في وصايا.. زي المسيح نفسه قال إن كام احد لم يولد من الماء والروح لا يقدر ان يدخل ملكوت الله..

ولما قال اقبلوا الروح القدس من غفرتم لهم خطاياهم غفرت ومن امسكتموها عليهم امسكت.. بسخرية .. «مساء الخير» .. لما الكهنة بيمسكوا علي الناس خطاياهم يبقوا خذوا مكان الله الديان.. ولا نشطب الآية دي عشان حضرتك ترتاح.. فوق يا حبيبي .. انت لسه بيبي صغير..

بتحبي.. فمتتسرعش من فضلك يعني.. هاه.. فمتتسرعش.. بولس الرسول بيقول الستم تعلمون انكم ستدينون ملائكة وان مكنش فيه حكيم بينكم فأجلسوا المحتقرين في الكنيسة.. وقال قد حكمت ان يسلم مثل هذا الشيطان لهلاك الجسد لكي تخلص الروح في يوم الرب.. وبعدما الرجل تاب قال مغفورة له المحبة لئلا ولما بطرس الرسول قال لحنانيا وسفيرة انتما لم تكذبا علي الناس بل علي الله لماذا تكذبان علي الروح القدس.. هتقع ميت دلوقتي.. وقال لها اللي شالوا جوزك هيشيلوكي ووقعت ميتة.. بطرس هنا خد مكان ربنا.. انا علي العموم هاعذرك في حاجة انك قلت آسف للتعدي في الكلام ولجهلي.. سامح ضعفي وجهلي.. ارجو الرد علي السؤال فهو يشغل تفكيري بشدة وما دام قلت كده يبقي انت كده بررت نفسك لأنك بتسأل وعايز تعرف فارجوك وابوس رجلك كمان.. هاه.. بلاش تسرع.. لأنك لسه في بداية طريق المعرفة.. متأخدش عبارة واحدة زي ما قداسة البابا امبارح قال «متاخدش عبارة واحدة زي ما قداسة البابا امباح قال «خطورة الآية الواحدة.. متروحش تآخد عبارة واحدة من هنا ولا من هنا ولا هنا..، ومتفهمش قصد الكاتب فيها ايه.. وتقيم عليها عقائد كثيرة جدا.. لا تتفق مع ايمان الكنيسة.. انا جوبت علي سؤال واحد فقط لاهميته ولأن الاخ ده يشق لنا الكنيسة ويقول القديسة ريتا.. سانت ريتا.. والقديس منصور.. وهذا يكفي دلوقتي والاسئلة ان شاء الله تكون في الاسئلة.

«تصفيق»