أنا معرفش لا حزب وطنى ولا غيره أنا تبع الرئيس مبارك!

هغنى لجمال فى فرحه وهغنى له عندما يصبح رئيساً لمصر!

كتب: إبراهيم أبورية

فى كل مناسبة يخرج علينا شعبان عبدالرحيم بأغنية جديدة ففى تعديل الدستور خرج بأغنية جديدة وسبقتها العديد من الأغانى عن مصر وإسرائيل، الجديد عند شعبان أنه ينوى تلحين وتوزيع أغنية لفرح جمال مبارك ليغنيها فى الفرح، كما ينوى لو أصبح جمال رئيساً لمصر أن يغنى له أغنية شعبان ما يعرفش لا حزب وطنى ولا غيره كل اللى يعرفه حزب حسنى مبارك.

< ما هى حكاية أغنية تعديل الدستور؟

ـ أنا متعود والناس متعودة منى أن أقدم أغنية لأى حدث فى البلد وأنا قدمت أغنية للدستور.

< ما هو رأيك فى التعديلات الدستورية؟

ـ أنا تابع لحسنى مبارك فى التعديل مليش دعوه بحزب إيه وحزب إيه.. ومليش فى حزب القمقراطية والحاجات اللى بيقولوا عليها دىة.

< ما رأيك فى تعديل المادة 179 الخاصة بقانون الإرهاب؟

ـ أنا معجب بها علشان تحمى الناس والبلد من الإرهابيين ونرتاج من قرفهم وأذيتهم للناس.

< نفهم من ذلك أنك معجب بالتعديلات؟

ـ أى حاجة فى تعديل الدستور أنا معجب بها بصلى ع النبى.

< لماذا لا تنتمى للحزب الوطنى؟

ـ أنا معرفش لا حزب وطنى ولا مش وطنى أنا بحب الحزب بتاع حسنى مبارك مليش دعوه بالحزب الوطنى ولا حزب شبابى.

< فعلاً عايز تغنى فى فرح جمال مبارك؟

ـ لو عمل فرح هغنى فيه ولازم أروح أغنى وهعمل له أغنية مخصوص من ألحانى وكلمات إسلام خليل.

< ولو جمال أصبح رئيساً للجمهورية؟

ـ هكون سعيد طبعاً وهعمل له أغنية جديدة مش ابن حسنى مبارك.

< رأيك فى الجواسيس واللى بيخونوا مصر؟

ـ اللى عمل كده مش مصرى وخاين وجبان والمفروض إنه لا يدخل السجن بل يوضع فى ميدان التحرير ويضرب بالنار هو واللى زيه لأن مصر متستاهلش الخيانة.

< تقول إيه فى وفاة حسن أبوالسعود؟

ـ لا يجوز عليه أى كلام غير الرحمة كان راجل طيب وابن حلال وكان عامل للنقابة حاجات كويسه.

< ترشح من يكون النقيب؟

ـ إحنا عايزين نقيب يكون كويس ويحل مشاكل الموسيقيين واللى معندهمش شغل وأنا أرشح عم أحمد الجمل رجل طيب وكويس.

< تطلب إيه من النقيب الجديد؟

ـ أطلب منه أن أى إنسان عنده موهبة الغناء يعطيه كرنيه النقابة لأن الموهبة من عند ربنا وميحرمش حد من الموهبة اللى ربنا أعطاها له.

< لماذا أنت مقل في أعمالك السينمائية؟

ـ فى الصيف سوف يعرض لى ثلاثة أفلام وهم.. أشرف حرامى مع شيرين رضا وتامر عبدالمنعم ونجوم كثيرة.. وفيلم مع شباب جديد أول مرة يمثل وأنا الوحيد اللى فيهم مشهور.. وهصور أغنية جديدة بكلم فيها اللحن بتاعى القديم وباقول له زهقت منك وعايز أغيرك وفعلاً يغير اللحن فى الأغنية ويرجع تانى للحن هو هو.. وابن عدوية بيعمل ألبوم جديد وأنا أشرف عليه.