خفة دم البابا شنودة

واحد صعيدى بيقوله انت جاموس «قاموس» يا سيدنا

فرد البابا: بس العجول «العقول» اللى تفهم

كتب: عارف الدبيس

معروف عن البابا شنودة خفة دمه وتميزه بسرعة بديهة عالية فعندما سئل عن العلاقة التى تجمع بين نظير جيد الخادم وبين الراهب انطونيوس السريانى والبطريرك شنودة الثالث اجاب : روح المرح وأضاف  "الناس كانت فاكرةه لما هبقى بطريرك هبطل ضحك ....مقدرش " وفى اخر حوار مع التليفزيون المصرى فى برنامج "اتكلم "عندما ألقى عددا من قصائده الشعرية من مكنون الماضى سرعان ما علقت المحاورة :  «ياما تحت القبة شيخ» فرد عليها البابا «شيخ النصارى » وهناك عشرات المواقف الكوميدية الساخرة التى تم تسجيلها للبابا وقام بجمعها احد الشمامسة ويدعى كرم لمعى موسى كما ان هناك العديد من المنتديات القبطية التى استطاعت هى الاخرى ان تجمع عددا من هذه المواقف والتى منها انه فى احدى زيارات البابا للصعيد وقف رجل صعيدى من الذين ينطقون القاف «جيم» فقال للبابا: إنت جاموس يقصد «قاموس» فى الكتاب المقدس. فرد البابا بسرعة بديهته المعروفة: بس العجول «العقول» اللى تفهم..

وفى لقاء جمع بين شيخ الازهر والبابا شنوده وبينهما منضدة عليها موبايل وكان البطريرك يرد علي المكالمات قائلا: مشغول عندي اجتماع غدا ليس الآن فسأله الشيخ طنطاوي: ياقداسة البابا أليست لي مكالمة؟ فقال الأنبا ياسيدي التليفون بيضرب جرس ولما يؤذن حديه لك

وفى احد اللقاءات واحد قال للبابا: أنا عندي داء النسيان ماذا افعل؟  فرد البابا وقال خايف اقولك تنسي بكرة

واخر يسأل: أنا بنام في اجتماع قداستكم ماذا افعل؟

رد البابا وقال ابقي فكرني اعمل اجتماع وأنت صاحي

وثالث يقول للبابا عندى 55 سنة وعاوز اتزوج فرد عليه وقاله: اذا كان انت عندك 55 يبقى لازم تاخد ام 44

وفى احدى المرات سأله رجل صعيدى و قال يا قداسة البابا أنا صعيدى وبلديات قداستك و جاى مصر علشان أسأل سؤال واحد ! هل فى يوم القيامة هنقوم صعايدة زى ما احنا و لا لع؟

ويرد البابا: فى الدينونة مش هتقوم صعيدى ربنا هيكون صلحك على الآخر.. وتقوم كملائكة الله فى السماء.

وواحدة تشتكى ابنها للبابا بتقول: الواد مكفر سيئاتى.. فقال: طيب إنتى ليه يكون عندك سيئات علشان يكفرها الواد

واخرى بتسأل البابا و تقوله: أنا عندى شهوة الأكل بدرجة كبيرة لدرجة إنى مهما أكون شبعانة آكل تانى. فقال البابا: الحمد لله إن الكاتدرائية مافيهاش أكل و أوعى تأكلى ذراع اللى قاعدة جانبك.

وهناك مذيع سأل قداسة البابا فى برنامج عن حكاية ان الاقباط هيعملو دولة خاصة بهم فى اسيوط.. فرد وقال:ازاى الكلام ده !! عندنا اساقفة كتير اوى ... هنوزعهم ازاى على اسيوط ... ممكن نخلى كل اسقف على حارة وممكن نسميهم «الآباء الحواريون».

وعن مراقبة الناس لبعضهم البعض يقول البابا فيه ناس بتراقب الناس بشكل صعب يعنى فى عزومة واحدة تقول للضيف أنت ما أكلتش من الصنف ده.. طاب و ايش عرفك.. أكيد بتعد عليه اللقم وواحد تانى بيقول للضيف كل من اللحمة.. يقول له أكلت فيرد عليه كل تانى.. يرجع يقوله انا أكلت حتتين لحمة.. فيرد بسرعة لع إنت أكلت 3 حتت!